बेनी– म्याग्दीको बेनी नगरपालिका– ३ भकिम्लीमा सम्पन्न बृहत स्वास्थ्य शिविरबाट ५ सय २८ बिरामीले निःशुल्क उपचार सेवा प्राप्त गरेका छन् ।

बेनी नगरपालिकाको आयोजना र बेनी अस्पतालको प्राविधिक सहयोगमा आयोजित शिविरमा भकिम्लीका विभिन्न बस्तीबाट बालबालिकादेखि वृद्धवृद्धाले स्वास्थ्य सेवा लिएका  बेनी नगरपालिकाका प्रवक्ता रामकृष्ण बराइलीले जानकारी दिए ।

‘स्वास्थ्य सेवामा सर्वव्यापी पहुँच, सबैका लागि स्वास्थ्य’ भन्ने मूल नारासहित सञ्चालित बृहत तथा निःशुल्क स्वास्थ्य शिविरबाट ४ सय ९ जना महिला र १ सय १९ पुरुषले सेवा लिएका प्रवक्ता बराइलीले बताए ।

उनका अनुसार शिविरमा १ सय ८ जनाले भिडियो एक्सरे, ९९ जनाले सुगर परीक्षण र २९ जनाले दाँतसम्बन्धी सेवा लिएका थिए । बेनी नगरपालिकाले चालू आर्थिक वर्षमा वडा नम्बर ३, ४ र ९ मा स्वास्थ्य शिविर सञ्चालन गर्न ८ लाख रुपैयाँ बजेट विनियोजन गरेको थियो ।

शिविरमा ६१ महिलाको पाठेघरको जाँच र क्यान्सर रोगको परीक्षण समेत गरिएको थियो ।

बेनी अस्पतालका डा नवराज बस्ताकोटीको नेतृत्वको चिकित्सक तथा स्वास्थ्यकर्मीको टोलीले बिरामीलाई सेवा प्रदान गरेको थियो । पछिल्लो समय चिनी रोगका बिरामी बढ्दै गएको पाइएको हुँदा खानपानमा ध्यान दिनुपर्ने, शारीरिक व्यायाम गर्नुपर्ने र नियमितरूपमा औषधि सेवन गरे यो रोगलाई न्यूनीकरण गर्न सकिने डा बस्ताकोटीले बताए ।