काठमाडौं– श्रम, रोजगार तथा सामाजिक सुरक्षा मन्त्रालयले अन्तर्राष्ट्रिय आप्रवासन दिवस मनाउनका लागि ‘कार्यक्रम’ घोषणा गरेको छ ।

मन्त्रालयले सातै प्रदेशका स्थानीय तहसँग समन्वयन गरेर आप्रवासन दिवस मनाउन बिहीबार पत्राकार सम्मेलन गरेर जानकारी दिएको छ ।

मन्त्रालयले आप्रवासन दिवसका अवसरमा वैदेशिक रोजगारीमा जाने श्रमिकका हकमा सूचना प्रवाह, स्थानीय तहमा विभिन्न कार्यक्रम गर्ने, वैदेशिक रोजगारीसम्बन्धी सडक नाटक, सुरक्षित रोजगारीका उपाय र वैदेशिक रोजगारीका फाइदा बेफाइदा जस्ता विषयमा सचेतना कार्यक्रम गर्ने जनाएको छ ।

श्रम मन्त्रालयले आप्रवासनमा रहेका श्रमिक सुरक्षाा तथा रोजगारीसँगै मानव अधिकारको बारेमा गम्भीर भएर काम गरिरहेको मन्त्रालयका सचिव विनोद केसीको भनाइ छ ।

आप्रवासनमा रहेका श्रमिकको कमाइलाई सुरक्षीत लगानीको वातावरण बनाउन सरकारले योजना बनाइरहेको पनि उनको भनाइ छ ।

श्रम मन्त्रालयले विभिन्न संस्था, ट्रेड युनियनहरुसँगको समन्वयनमा आप्रवासन दिवस मनाउने जनाएको छ । सन् १९९० देखि हरेक वर्षको डिसेम्वर १८ का दिन विश्वभर आप्रवासन दिवस मनाउने गरिन्छ ।