काठमाडौं- काठमाडौंमा महाबाणिज्य दूतहरुको तीन दिवसीय सम्मेलन हुने भएको छ ।

महाबाणिज्य दूतहरुको छाता संगठन विश्व महाबाणिज्य काउन्सिल (फिका) र अवैतनिक कन्सुलर नेपाल एचसीसीले सोमबार पत्रकार सम्मलेन गरी सम्मेलनबारे जानकारी दिएका हुन् । सम्मेलन कात्तिक २६ देखि २९ गतेसम्म चल्ने एचसीसीले जानकारी दिएको छ ।

विश्वमा पछिल्लो समय भइरहेको आर्थिक गतिविधि, सामाजिक रुपान्तरण, जलवायु परिवर्तनजस्ता विषयमा सम्मेलनमा छलफल हुने एचसीसी साउथ एसियान डिन प्रदिपकुमार श्रेष्ठले जानकारी गराए ।

विश्व अर्थतन्त्रसँगै नेपालका गतिविधि, पर्यटन क्षेत्र, माइग्रेशन, अध्यागमन जस्ता विषयमा पनि सम्मेलनमा छलफल गरिने उनको भनाइ छ ।

विश्व अर्थतन्त्रमा सहज वातावरण निर्माण गर्नका लागि ऐक्यबद्धता जनाउँने उद्देश्यले सम्मलेनको आयोजना गरिएको फिकाले जनाएको छ ।

सम्मेलनमा सामाजिक ऐक्यबद्धता, लैंगिक समानता, मौसम परिवर्तन र विश्वव्यापीकरण जस्ता विषयमा छलफल हुने भएको छ ।

सम्मेलनको उदघाटन उपराष्ट्रपति नन्दकिशोर पुनले गर्ने कार्यक्रम तय भएको छ । उक्त सम्मलेनमा परराष्टमन्त्री प्रदिप कुमार ज्ञवालीले सम्बोधन गर्ने कार्यक्रम रहेका फिकाले जानकारी दिएको छ ।