विराटनगर – निर्देशक तथा कलाकार दीपाश्री निरौला र गायक सुमित खड्कालाई विराटनगर महानगरपालिकाले सद्भावना दूत नियुक्त गरेको छ ।

महानगरपालिकाले आइतवार विराटनगरमा सुमित खड्काको एकल कन्सर्ट कार्यक्रममा महानगरपालिकाका मेयर भीम पराजुलीले खड्का र निरौलालाई सद्भावना दूत नियुक्त गरेका हुन् ।

निर्देशक दीपाश्री निरौलाले सामाजिक सञ्जाल फेसबूकमा स्टाटस लेखेर थप जिम्मेवारी महसूस गरेको भन्दै महानगरपालिका परिवारलाई धन्यवाद दिएकी छिन् ।

निर्देशक निरौला र गायक खड्का दुवै विराटनगरवासी हुन् ।

विराटनगर महानगरपालिकाका मेयर पराजुलीले कलाकारको सम्मान र समग्र विराटनगरको विकासका लागि सद्भावना दूत नियुक्त गरेको बताए ।

गायक सुमित खड्काले राष्ट्रिय गीत समेत गाएका छन् भने दीपाश्री निरौला फिल्म क्षेत्रमा सक्रिय छिन् ।