काठमाडौं – नेपाली राष्ट्रिय भलिबल टोलीले एभीसी सेन्ट्रल जोन भलिबल च्याम्पियनसिपको पहिलो खेलमा अफगानस्तानमाथि शानदार जित हात पारेको छ ।

बंगलादेशमा जारी प्रतियोगिताको आफ्नो पहिलो खेलमा अफगानस्तानसँग खेलेको नेपाली महिला भलिबल टोलीले अफगानस्तानलाई ३–० को सोझो सेटमा पराजित गरेको हो ।

अरुणा शाहीको नेतृत्वमा रहेको नेपाली टोलीले अफगानस्तानमाथि दबदबा राख्दै २५–४, २५–९ र अन्तिम सेटमा अफगानस्तानलाई २५–६ को सोझो सेटमा पराजित गरेको हो ।

नेपाली महिला टोलीका ६ जना खेलाडीले अफगानस्तानविरुद्ध राष्ट्रिय टोलीबाट अन्तर्राष्ट्रिय डेब्यु गरे । जसमा लिब्रो सलिना श्रेष्ठसँगै निरुता ठगुन्ना, जानकी भण्डारी, सुनिता खड्का, पुनम चन्द र सोफिया पुनले डेब्यु गरे ।

अब नेपालले दोस्रो खेल सोमबार किर्गिस्तानसँग खेल्नेछ भने मंगलबार आयोजक बंगलादेश र बुधबार माल्दिभ्ससँग खेल्नेछ ।