नयाँ दिल्ली– भारतमा एक नेपालीको हत्या अभियोगमा प्रहरीको खोजी सूचीमा रहेका एक जनालाई प्रहरीले पक्राउ गरेको छ । उनको हातमा रहेको ट्याटूका कारण उनलाई पक्राउ गर्न प्रहरी सफल भएको हो ।

भेष बदल्ने बहुरुपी हत्याराको हातमा रहेको ट्याटूका कारण पक्राउ गरिएको प्रहरीले जनाएको छ । प्रहरीले ती हत्यारालाई धेरै लामो समयदेखि खोजी गर्दै आएको थियो ।

गत जुन महिनामा राजधानी दिल्लीमा हरबीर नाम गरेका व्यक्तिले एक नेपालीको हत्या गरेका थिए । मदिरा पसलमा ती भारतीय नागरिकले एक नेपालीलाई मदिरा खान दिए । मदिराले लट्ठ भएपछि ती नेपालीले भारतीय नागरिकको पैसा लुट्न खोजेपछि उनीहरुबीच हात हालाहाल भयो । हरबिरले यतिकैमा नजिकै रहेको ढुङ्गाले हानेर ती नेपालीलाई मारिदिए । त्यसपछि उनी फरार थिए ।

हत्या भएको स्थान नजिकै रहेको दारुको लेबलमा रहेको बारकोडका आधारमा प्रहरीले उनीहरुले रक्सी किनेको दारु दुकान फेला पार्यो । सीसीटिभी फुटेजबाट मृतक र हत्याराको पहिचान भयो । हत्यारा हरबिरको हातमा ट्याटू थियो । त्यसपछि हरबिर प्रहरीसँगबाट बच्न आफ्नो भेष बदल्दै हिड्न लागे । प्रहरीसँग हत्या आरोपी हरबिरसम्म पुग्न ट्याटूबाहेक कुनै सुराकी थिएन ।

एकदिन हत्यारा हरबिर रक्सी किन्न भेष बदलेर त्यही दुकान पुगे । प्रहरीले दारु दुकानको कडा निगरानी गरिरहेका बेलामा सीसीटिभीको फुटेज पुनः जाँच गरियो । हातमा रहेको ट्याटूका आधारमा प्रहरीले हरबिरलाई चिन्यो र पक्राउ गर्यो । पक्राउ परेका हरबिर हाल दिल्ली प्रहरीको नियन्त्रणमा रहेको र उनीविरुद्ध कानून प्रक्रिया अघि बढाइएको प्रहरीलाई उद्धृत गर्दै भारतीय सञ्चारमाध्यमले जनाएका छन् ।