दार ए सलाम– अफ्रिकी मुलुक तान्जानियामा इन्धन बोकेको ट्यांकर विष्फोट हुँदा कम्तीमा ६० जना मारिएका छन् ।

मोरोगोरो क्षेत्रमा भएको दुर्घटनामा अरु ७० भन्दा धेरै घाइते भएका छन् । ट्यांकर विष्फोट भएको क्षेत्र तान्जानियाको सबैभन्दा ठूलो शहर दार एस सलामदेखि २० किलोमिटर टाढा पर्छ ।

प्रहरीले खोजी तथा उद्धारका लागि सुरक्षाकर्मी, उद्धारकर्मी, स्थानीय बासिन्दालगायत खटिएको जनाएको छ । घाइतेमध्ये धेरैको अवस्था गम्भीर भएकाले मृत्यु हुनेहरुको संख्या अझ बढ्न सक्ने आँकलन गरिएको छ ।

स्थानीय समयअनुसार बिहान ८ बजे दुर्घटना भएको हो । ट्यांकर पल्टेर चुहिरहेको इन्धन जम्मा पार्न स्थानीयहरु भेला भएका बेला ट्यांकर विष्फोट भएको बताइएको छ ।

ट्यांकर विष्फोट हुने बेला स्थानीयहरु तेल जम्मा पार्न भेला भएका कारण ठूलो मानवीय क्षति भएको अधिकारीले जनाएका छन् ।