काठमाडौं– साउदीका राजा सलमान बिन अब्दुल्लाजिज अलले पछिल्लो समय आर्थिक मन्दीमा परेर बन्द हुने अवस्थामा पुगेका रोजगारदाता कम्पनीका लागि बजेट विनियोजन गरेका छन् ।

राजा सलमानले सन् २०१७ /२०१८ मा विदेशी कामदार अनुमति पत्रको शुल्क तिर्न नसकेका साना तथा मझौला कम्पनीहरूलाई ११ अर्ब ५० करोड साउदी रियाल विनियोजन गरेको साउदी अरबका सञ्चारमाध्यमले समाचार प्रकाशन गरेका छन् ।

गएको दुई वर्षदेखि आर्थिक मन्दीबाट बन्द हुने अवस्थामा पुगेका साउदीका कम्पनीहरुलाई यसले ठूलो राहत पुग्ने र स्थानीय नागरिकसहित विदेशी कामदारलाई निर्माण क्षेत्रमा पुन रोजगारीका अवसर सिर्जना हुने सम्भावाना देखिएको छ ।

राजा सलमानले मन्दीमा परेका कम्पनीका लागि छुटाएको बजेट साउदीको श्रम मन्त्रालयले आर्थिक संटकमा परेका कम्पनीको अध्ययन गरेर वितरण गरिने योजना रहेको जानएको छ ।

साउदी अरबमा हाल नेपालीसहित ८० लाख भन्दा बढी आप्रवासी कामदार रहेका छन् । उनीहरुले त्यहाँ कम तलबमा जोखिमपूर्ण काम गरिरहेका छन् । कतिपयले महिना पुरा भएको लामो समयसम्म पनि तलब, सुविधा पाउन सकेका छैनन् । तलब नपाउनेमा साउदी नागरिकको संख्या ठूलो रहेको विभिन्न सञ्चारमाध्यम जनाउदै आएका छन् ।

पछिल्लो समय साउदीमा देखिएका आर्थिक मन्दीका कारण विदेशी कामदार भित्रिने क्रम मासिक रुपमा घट्दै गएपछि त्यहाँ सरकारले आप्रावासी र स्वदेश श्रमिक बराबर राखेको रोजगारदाता कम्पनीलाई निर्देशन दिएको छ ।