काठमाडौं – नेपाली फिल्मकर्मीका लागि फिल्ममाथि हुने समालोचना ठूलो चुनौती बन्न थालेको छ । पछिल्लो समयमा आएर फिल्मकर्मीहरु खुलेआम चलचित्रको समीक्षा एक हप्तापछि हुनुपर्ने धारणा राख्न थालेका छन् । फिल्म क्षेत्रका दिग्गज मानिने कलाकारले नै नेपाली चलचित्रको समीक्षा एक हप्तापछि हुनुपर्ने धारणा राख्न थालेका छन् ।

अभिनेता प्रदीप खड्काले यसअघि चलचित्र ‘लभ स्टेशन’ को प्रदर्शनका बेला चलचित्रको समीक्षा एक हप्तापछि हुनुपर्ने धारणा राखेका थिए । फिल्ममेकर समीक्षासँग डराएर दर्शकलाई ‘भगवान्’ भन्दै फिल्मको बचाउ गर्ने कलाकारले सूची निकै लामो छ ।

नेपाली फिल्मको स्तर झनभन्दा झन् कच्चा बन्न पुग्दा दर्शक गुमिरहेको अवस्थामा फिल्मको स्तरीयतालाई लिएर लेखिएका समीक्षा पनि हप्तापछि सार्नुपर्छ भन्ने सोचले यो चाहिँ प्रष्ट पार्छ कि, अझै पनि फिल्ममेकर दर्शकलाई फिल्म राम्रो बनेको लोभ देखाएर हलसम्म तान्न चाहन्छन् । तर, अहिलेका दर्शक निकै एडभान्स भइसकेका छन् । बरु उनीहरु विदेशी फिल्म हेर्छन् तर झुर फिल्म हेरेर समय नष्ट गर्दैनन् ।

यस्तो अवस्थामा नेपाली फिल्मको समीक्षा एक हप्ता पछाडि लेख्दा के फिल्म बजार फस्टाउँछ ? यो बुझाइलाई कतिपयले मजाक बनाएका छन् । फिल्म राम्रो बनायो भने दर्शक आफै फिल्म हलमा आउँछन् । समीक्षा नै सारिनुपर्छ भन्ने तर्क गर्नुभन्दा बरु एक हप्ता पछाडि फिल्मको रिलिज मिति सारेर अझ स्तरीय फिल्म पो बनाउने हो कि ?