मलावी– अफ्रिकी मुलुक मलावीमा बाढीबाट मृत्यु हुनेको सङ्ख्या २८ पुगेको छ । भारी वर्षासँगै मुलुकका विभिन्न क्षेत्रमा आएको बाढीबाट अरु ४५ हजार ३ सय १२ परिवारका २ लाख २६ हजार ५ सय ६० जनाभन्दा धेरै प्रभावित भएको अधिकारीले जनाएका छन् ।

त्यसबाहेक बाढीबाट अरु दर्जनौँ मानिसहरु अझै हराइरहेको र १ सय २४ जना घाइते भएको बताइएको छ । बाढीले सडक, विद्युतसेवा, सञ्चार तथा अन्य भौतिक पूर्वाधारमा क्षति पुगेको छ ।

बाढीबाट नदीमा पानीको सतह माथि आएर मुलुकका सयौँ वर्गकिलोमिटर क्षेत्र डुबानमा समेत परेको छ । बाढीपछि मलावीका राष्ट्रपति अर्थर पिटर मुटारिकाले गत शुक्रबार संकटकाल घोषणा गरेका थिए ।

त्यसबाहेक बाढीले छिमेकी मुलुक मोजाम्बिकाको पश्चिमी क्षेत्रलाई पनि प्रभावित बनाएको अन्तर्राष्ट्रिय सञ्चारमाध्यमले जनाएका छन् ।