रौतहट– नेकपाका अध्यक्षसमेत रहेका प्रधानमन्त्री केपी शर्मा ओलीले आफू अनवरत रुपमा मधेशको हक हितको लागि लडिरहेको बताएका छन् ।

नेकपा प्रदेश नम्बर दुईले रौतहटमा आयोजना गरेको आमसभालाई सम्बोधन गर्दै प्रधानमन्त्री ओलीले आफू ४६ वर्षअघि पनि यही स्थानबाट गिरफ्तार परेको बताए ।

नेकपा मधेश विरोध पार्टी भन्दै हल्ला फैलाइएको भन्दै ओलीले असन्तुष्टि व्यक्त गरे । ‘ नेकपा तराईमा विस्थापित छ भन्ने हल्ला छ । नेकपा मधेश तराई विरोधी पार्टी हो भन्ने हल्ला छ’ ओलीले भने,‘ तराई मधेशको हक हितका लागि ४६ वर्ष अघि म यही ठाउँबाट गिरफ्तार भएको थिएँ, अनि हामी नै तराई मधेश विरोधी ?’

उनले मधेशको हरेक क्षेत्रमा विकास गर्ने, राजमार्गहरुलाई सुधार र विस्तार गर्ने, मधेसको समस्या समाधानका लागि काम गर्ने प्रतिवद्धता व्यक्त गरे ।

तराईको समस्या आफूलाई थाहा भएको भन्दै प्रधानमन्त्री ओलीले बाढी डुवानको समस्या समाधानका लागि सरकारले काम गरिरहेको बताए ।

सीमानमा भारतले बनाएको बाँधले पारेको डुवानको समस्याका बारेमा भारतीय प्रधानमन्त्री नरेन्द्र मोदीसँग गम्भीरतासाथ कुरा गरेको र डुवानको समस्या समाधनमा मोदी सकारात्मक रहेको ओलीले बताए ।

तराई मधेशको विकासलाई अगाडि बढाउन सरकार गम्भीर रहेको प्रधानमन्त्री ओलीले बताए ।

विकास आवश्यक भएर जनताले नेकपालाई बहुमत दिएको र त्यसको सम्मान हुने ओलीको भनाइ थियो ।