प्रेम एक भावना हो । यो स्नेह, लगाव र आत्मियताको मिश्रण पनि हो । प्रेम आफैमा अर्थपूर्ण, अनमोल अनि निकै गहन छ । प्रेमका कारण कतिपय संबन्धले इतिहास रचेका छन् भने केहिले यसमा द्वन्द्व भोग्ने र ज्यान समेत गुमाएका छन् ।

प्रेममा परेकाहरु ज्यान लिन र दिन समेत पछि पर्दैनन् । तर पनि प्रेमको कुनै परीधि हुदैन न त यसको कुनै नियम नै हुन्छ । तर विश्वमा केहि यस्ता कम्पनीहरु पनि छन् जसले आफ्ना कर्मचारीलाई प्रेम गर्न प्रतिबन्ध लगाउदै आएका छन् । प्रतिबन्ध पनि यतिसम्म कि प्रेम गरेकै कारण जागिरबाट निकाला गरिन्छ । हो पत्याउनै नसकिने घटना अन्त कहि नभएर अमेरीकाको हो ।

बर्गर तथा फाष्टफुटका लागि चर्चित रेष्टुरेन्ट म्याकडोनाल्ड्सले प्रमुख कार्यकारी अधिकृतलाई प्रेम गरेको भन्दै जागिरबाट निकाला गरेको छ । म्याकडोनाल्ड्सको मुख्यालयमा कार्यरत सहकर्मीसंग प्रेम गरेको भन्दै सीइओ स्टीव ईस्टरब्रुकलाई जागिरबाट निकालेको हो ।

विश्वका अधिकाशं देशमा हजारौको संख्यामा फैलिएको फाष्टफुड उत्पादक रेष्टुरेन्ट म्याकडोनाल्ड्सले आफ्नो नीति उल्लंघन गरी मुख्यालयकै कर्मचारीसंग प्रेम गरेको भन्दै स्टीवलाई निकालेको हो ।

कम्पनीका अनुसार वरिष्ठ पदका कर्मचारीलाई सहकर्मीसंग प्रेम गर्न प्रतिबन्ध लगाइएको थियो  ।  स्टिवले त्यसको उल्लघंन गर्दै प्रेम गरे फलस्वरुप उनलाई जागिरबाट निकालिएको हो ।

ईस्टरब्रुकले पनि प्रेम रहेको स्विकार्दै आफू कम्पनीको नीति विपरीत गएको बताएका छन् । म्याकडोनाल्ड्सले यस बिषयमा लामै बहस चलाएको थियो । जस अनुसार एक साता अघि उनलाई जागिरबाट निकाल्ने बिषयमा सहमति जुटाएको थियो ।

स्टिव निष्काशनमा परेपछि म्याकडोनाल्ड्सको अध्यक्ष र सिइओमा क्रिस क्येम्पस्जिन्स्की नियुक्त भएका छन् । क्रिसलाई स्टिवले नै केहि बर्षअघि म्याकडोनाल्ड्समा ल्याएका थिए । विश्वका अधिकाशं देशका चर्चित शहरमा म्याकडोनाल्ड्सको ३७ हजार ८ सय ५५ वटा रेस्टुरेन्ट रहेको छ ।