काठमाडौं– नेपालमा हाल चार सय ५० जना दृष्टिविहीन शिक्षण पेशामा आबद्ध रहेको एक तथ्यांकले देखाएको छ ।

एमजीपी नेक्स्टजेन नामक संस्थाका अनुसार ४२ जना दृष्टिविहीन सरकारी सेवामा छन् भने एक सयभन्दा बढी विभिन्न क्षेत्रमा कार्यरत छन् ।

दृष्टिविहीनहरुका क्षमता प्रस्फुटन गराउने उद्देश्यले राजधानीमा आयोजित एक कार्यक्रममा शिक्षा र अवसर पाएको खण्डमा उनीहरु पनि आत्मनिर्भर बन्न सक्ने भन्दै शिक्षाको सहज पहुँचमा सबैले जोड दिए ।

नेपालमा हाल ९४ हजारभन्दा बढी व्यक्तिहरु दृष्टिविहीन भएपनि उनीहरु गरिबी, शिक्षा, रोजगार अभावका कारण पछाडी पर्दै आएका छन् ।कार्यक्रममा विभिन्न क्षेत्रमा कार्यरत दृष्टिविहीनहरुले आफ्ना प्रस्तुतीहरु राखेका थिए ।

दृष्टिविहीनहरुले पनि शिक्षा र अवसर पाए भने आत्मनिर्भर हुन सक्छन् भन्ने सन्देश दिन कार्यक्रमको आयोजना गरेको ‘सेन्सिङ द वन्डरफुल वल्र्ड यु सि’ की संरक्षक साराह गिरीले बताइन् ।

सहभागीहरुले दृष्टिविहीनलाई ब्रेललिपीको माध्यमबाट शिक्षा दिएर आत्मनिर्भर बनाउनुपर्नेमा जोड दिए ।

कार्यक्रममा स्वास्थ्य तथा जनसंख्यामन्त्री उपेन्द्र यादव, वरिष्ठ कलाकार मदन कृष्ण श्रेष्ठ र उद्योगी विनोद चौधरीलगायतका विभिन्न क्षेत्रका व्यक्तिको उपस्थिति थियो ।