इस्लामावाद– जम्मू कश्मीरलाई विशेष राज्यको मान्यता दिने भारतीय संविधानको धारा ३७० र ३५ ए खारेज गरी जम्मू कश्मीरलाई केन्द्र प्रशासित दुई राज्यमा विभाजन गर्ने भारत सरकारको निर्णयविरुद्ध ‘सैनिक विकल्प’ प्रति पाकिस्तानले ध्यान नदिएको पाकिस्तानी विदेशमन्त्रीले जनाएका छन् ।

पाकिस्तानी विदेशमन्त्री शाह महदुम कुरेशीले राजधानी इस्लामावादमा पत्रकार सम्मेलन गर्दै भारतविरुद्ध सैनिक कदम चाल्न पाकिस्तान तयार नभएको जनाएका हुन् । यद्यपि उनले भारतको कुनै किसिमको सैनिक आक्रमकताको जवाफ दिन भने पाकिस्तान तयार रहेको जनाएका छन् ।

कश्मीरबारे भारतीय निर्णयप्रति पाकिस्तानले विभिन्न कदमहरु चालिरहेका बेला पाकिस्तानी विदेशमन्त्रीले सैनिक कदमका लागि खुला नरहेको जनाएका हुन् ।

भारत र पाकिस्तानबीच कश्मीरको सार्वभौमिकतालाई लिएर विवाद छ । दुई मुलुकबीच कश्मीरकै विवादलाई लिएर दुई पटक युद्ध भइसकेको छ ।