काठमाडौं–सहायक रथी शरदलाल श्रेष्ठलाई काठमाडौं–निजगढ फास्ट ट्र्याक आयोजना प्रमुखको जिम्मेबारीबाट हटाइएको छ ।

तत्कालीन आयोजना प्रमुख प्राविधिक उपरथी योगेन्द्र खाँडमाथि लागेको आर्थिक अनियमितता प्रकरणमा सोधपुछका लागि भन्दै सहायक रथी श्रेष्ठलाई आयोजना प्रमुखको जिम्मेवारीबाट हटाइएको नेपाली सेनाले जनाएको हो ।

फास्ट ट्र्याकको आर्थिक अनियमितता आरोप प्रमाणित नभएसम्मका लागि सोधपुछका लागि श्रेष्ठलाई जिम्मेवारीबाट हटाइएको सेनाका प्रवक्ता सहायक रथी विज्ञानदेव पाण्डेले जानकारी दिए ।

तत्कालीन आयोजना प्रमुख प्राविधिक उपरथी खाँडमाथि आर्थिक अनियमितताको आरोप छ । खाँड आयोजना प्रमुख हुँदा सहायक रथी श्रेष्ठ डिजाइन प्रमुख थिए । सोही कारण उनीमाथि सोधपुछ गर्नुपर्ने भएकाले केही समयका लागि सहायक रथी श्रेष्ठलाई जिम्मेवारीबाट हटाइएको प्रवक्ता पाण्डेले बताए ।

फास्ट ट्र्याक आयोजनामा आर्थिक अनियमितता गरेको आरोप लागेका खाँडमाथि नेपाली सेनाले अनुसन्धान गरिरहेको छ । श्रेष्ठलाई आयोजना प्रमुखबाट हटाएपछि सो जिम्मेवारी महासेनानी विकास पोखरेललाई दिइएको छ ।