काठमाडौं – कुनै समय थियो, गायकहरुले नेपालका गाउँगाउँ डुलेर गीत तयार पार्ने गर्थे । पछिल्लो पुस्ताका गायक गायिकाले भने संगीत चोरी गर्ने गरेको आरोप निरन्तर खेप्नुपरेको छ । यसैबीच वरिष्ठ गायक कुमार बस्नेले पछिल्लो समय संगीत चोरी हुन थालेको घटना लाजमर्दो भएको बताएका छन् ।

साथै उनले नेपाली संगीत क्षेत्रमा गीत चोरीका घटना बढेकोमा उनले चिन्ता व्यक्त गरे । ‘चोरेर खुशी हुन्छन्, अब हामीले के भन्ने ? मैले बोलेर हुने कुरा होइन, मलाई त नेपाली हुँ भन्न पनि लाज लाग्न थाल्यो,’ खबरहबसँगको कुराकानीमा गायक बस्नेतले भने, ‘पहिले पहिले चोर्नु महापाप हो भन्थे, अहिले चोरेर ठूलो भइन्छ भन्ने परेको छ ।’

उनले नेपाली संस्कृति बचाउने हो भने पहिले नेपाली मौलिक गीत बचाउनुपर्ने धारणा राखे । ‘देशप्रति माया छ भने पहिले संगीत बचाउनुस्, अस्तित्व बचाउनुस्,’ उनले भने ।

पछिल्लो समय नेपाली संगीत क्षेत्रमा संगीत चोरीको आरोप बहसको विषय बनेको छ । केही समयअघि गायक प्रकाश सपूतको गीत ‘गलबन्दी’ पनि चोरीको लफडामा मुछिएको थियो ।