मेलबर्न– ‘पेशेवर मगन्ते गिरोह’ सञ्चालन गरिरहेको आशंकामा अष्ट्रेलियामा ७ चिनियाँ नागरिक पक्राउ परेका छन् । पर्यटन भिसामा अष्ट्रेलिया प्रवेश गरेका उनीहरुलाई मेलबर्न शहरको केन्द्रिय भागबाट नियन्त्रणमा लिइएको हो ।

उनीहरुले सडकमा आफूसँग केही नभएजस्तो स्वाङ पारी भिक माग्ने गरेको प्रहरीले जनाएको छ । यद्यपि उनीहरुलाई बस्न खानको कुनै समस्या नभएपनि उदार मेलबर्नबासीको दयालुपनको फाइदा उठाउँदै उनीहरुले भिख माग्ने गरेको अष्ट्रेलियाका सञ्चारमाध्यमले जनाएका छन् ।

पक्राउ पर्नेहरु ६५ देखि ७२ वर्ष उमेर समूहका छन् । अघिल्लो सोमबार र मंगलबार गरिएको कारवाहीका क्रममा उनीहरुलाई गिरफ्तार गरिएको तथा उनीहरुको साथबाट १००० अष्ट्रेलियन डलर, अष्ट्रेलियन मुद्रालाई चिनियाँ मुद्रामा विनिमय गरेको रसिद र अन्य दस्तावेज बरामद गरिएको जनाइएको छ ।

मेलबर्न शहर रहेको अष्ट्रेलियाको भिक्टोरिया राज्यमा भिख माग्न पाइन्न ।