काठमाडौं – आईसीसी अन्तर्राष्ट्रिय एकदिवसीय विश्वकप क्रिकेटमा अस्ट्रेलियाले क्यारेबियन टोली वेष्ट इन्डिजलाई २ सय ८९ रनको लक्ष्य दिएको छ ।

नोटिङघामस्थित ट्रेन्टब्रिजमा भएको खेलमा अस्ट्रेलियाले ४९ ओभर खेल्दै सबै विकेट गुमाएर २ सय ८८ रन बनायो । जारी विश्वकपमा दोस्रो खेल खेलेको अस्ट्रेलियाले टस हारेर ब्याटिङको निम्तो पाएसँगै ब्याटिङमा पनि कमजोर शुरुवात गरेको थियो ।

तर, अस्ट्रेलियालाई खेलमा फर्काउन स्टेभ स्मिथ र एलेक्सले उत्कृष्ट ब्याटिङ गर्दै वेष्ट इन्डिजमाथि हावी भएको थियो । अस्ट्रेलियाका लागि नाथन कौलटेर निलल खेलमा सर्वाधिक ९२ रन बनाए । उनले जम्मा ६० बलको सामना गर्दै ८ चौका र ४ छक्काको मद्दतमा ९२ रन बनाएका हुन् ।

यस्तै, स्मिथले १०३ बलमा ७३ रन बनाउँदा एलेक्स कारेयले ४५ रन बनाएका थिए । टस जितेर अस्ट्रेलियाविरुद्ध फिल्डिङ रोजेको वेष्ट इन्डिजका लागि कार्लोस बार्थबेटले ३ विकेट लिए भने ओसन थोमस, सेल्डन कोट्रेल, आन्द्रे रसेलले समान २–२ विकेट लिँदा जसन होल्डरले १ विकेट लिए ।