खार्तुम– १ सय ८ जनाको ज्यान जानेगरी प्रदर्शनकारीमाथि सेनाले दमन गरेपछि सुडानका प्रदर्शनकारी विपक्षी नेताहरुले हाल सत्तामा रहेको सैनिक परिषद्सँग वार्ता नगर्ने जनाएका छन् ।

तत्कालिन राष्ट्रपति ओमर अल बसिर सत्ताच्युत भएपछि हाल त्यहाँको सैनिक परिषद्ले सरकार चलाइरहेको छ । सैनिक परिषद्सँग असन्तुष्ट प्रदर्शनकारीले विशाल प्रदर्शन गर्दै आएकोमा सेनाले दमन गरी गोली चलाएपछि १ सय ८ जनाको ज्यान जानुका साथै अन्य ५ सय भन्दा धेरै घाइते भएका छन् ।

यता सैनिक परिषद्ले भने यसअघि नागरिक मोर्चासँग गरिएको सम्झौता भंग गर्दै नौ महिनाभित्र आम निर्वाचनको घोषणा गरेको छ भने नागरिक मोर्चालाई वार्तामा आउन आह्वान गरेको छ ।

यसअघि सैनिक परिषद्ले आगामी तीन वर्षभित्र सुडानको सत्ता नागरिक सरकारलाई हस्तान्तरण गर्नेगरी नागरिक मोर्चासँग सम्झौता गरेको थियो ।