ल्याटिन अमेरिकी मुलुक बोलिभियामा पहिरो जाँदा कम्तीमा १४ जनाको ज्यान गएको छ ।

राजधानी ला पाजलाई उत्तरी शहर काराभानीसँग जोड्ने सडकमा दुईवटा पहिरो गएको बोलिभियाका सरकारी अधिकारीले जनाएका छन् । घटनामा अरु ७ जना हराइरहेका छन् ।

पछिल्ला केही दिन यता भारी वार्षापछि पहिरो गएको हो । पहिरोले सडकमा गुडिरहेका ६ सवारी साधनमा क्षति पुर्या‍एको र त्यसबाट ५० जनाभन्दा धेरै घाइते भएका छन् ।

राष्ट्रपति इभो मोरालेजले ३४ जना घाइतेलाई उद्धारकर्मीले हेलिकोप्टरको प्रयोग गरी उद्धार गरेको ट्विटरमार्फत् जानकारी दिएका छन् । उनले मानिसहरुलाई पहिरो प्रभावित क्षेत्रबाट टाढै बस्न आग्रह समेत गरेका छन् ।

पहिरोपछि काराभानी शहरका शिक्षा अधिकारीले नयाँ शैक्षिक सत्रको अध्यापन कार्य एक साताका लागि स्थगित गरेका छन् ।

राजधानी ला पाजलाई अमेजन जङ्गलसँग जोड्ने यो सडकलाई संसारकै सबैभन्दा खतरनाकमध्येको एक मानिन्छ ।

एजेन्सी