काठमाडौं- पोर्चुगलको एक बैंकले भेनेजुएलाको १ अर्ब २० करोड अमेरिकी डलर रकम रोक्का गरिदिएको छ । भेनेजुएलाले पोर्चुगलबाट उरुग्वेतर्फ स्थानान्तरण गर्न लागेको सो रकम पोर्चुगलको नोभो ब्याङ्कोले रोक्का गरिदिएको भेनेजुएलाका विपक्षी नेता कार्लोस पापारोनीले जनाएका छन् ।

पोर्चुगलले भेनेजुएलाका राष्ट्रपतिमा हुआँ गुआइदोलाई मान्यता दिएको केही घण्टालगत्तै पोर्चुगलको बैंकले भेनेजुएलाका रकम रोक्का गरिदिएको हो । नोभो ब्याङ्कोको ७५ प्रतिशत स्वामित्व अमेरिकी कम्पनी लोनस्टार फण्डस्का नाममा रहेको बताइएको छ ।

यता क्याथोलिक धर्मगुरु पोप फ्रान्सिसले भने भेनेजुएलाको संकटमा मध्यस्थता गर्नसक्ने जनाएका छन् । ऐतिहासिक मध्यपूर्वको भ्रमणबाट फर्कने क्रममा अबुधाबीमा बोल्दै पोपले भेनेजुएलाका राष्ट्रपति निकोलस मादुरोले आफूलाई पत्र लेखेको तर आफूले त्यो पत्र पढ्न बाँकी रहेको बताएका छन् । यद्यपि, भेनेजुएलाको संकटमा आफूले मध्यस्थता गर्न सक्ने उनको दाबी थियो ।

भेनेजुएलाका राष्ट्रपति मादुरोले पनि आफूले पोपलाई संकट समाधानका लागि मध्यस्थता गरिदिन आग्रह गरेको स्वीकार गरेका छन् । इटालीको स्काई टिजी ट्वेन्टी फोर टेलिभिजनसँगको अन्तरवार्तामा मादुरोले आफूले पोपलाई सहयोगको आग्रह गरेको स्वीकारेका हुन् ।

गत २३ जनवरीमा विपक्षी नेता हुआँ गुआइदोले आफूले आफैँलाई राष्ट्रपति घोषणा गरेपछि भेनेजुएलामा राजनीतिक संकट चर्किएको छ । अन्तर्राष्ट्रिय समुदाय पनि दुई चिरामा विभाजित भएका छन् । अमेरिकासहित युरोपेली तथा अन्य पश्चिमा मुलुकले हुआँ गुआइदोलाई राष्ट्रपतिको मान्यता दिएका छन् भने चीन र रुससहित अन्य मुलुकले मादुरोलाई नै भेनेजुएलाका राष्ट्रपति मानेका छन् ।

राजनीतिक संकट चुलिँदै जाँदा सन् २०१३ मा भेनेजुएलाका तत्कालीन राष्ट्रपति ह्युगो चाभेजको निधनयता सत्तामा रहेका मादुरोमाथि राजीनामा दिनुपर्ने दबाब बढ्दै गएको अन्तर्राष्ट्रिय सञ्चार माध्यमले जनाएका छन् ।-एजेन्सी