काठमाडौं – आज शुक्रबारदेखि नेपालभर सौगात मल्ल स्टारर फिल्म ‘माछा माछा’ प्रदर्शनमा आएको छ । क्राइम कमेडी जानरामा निर्माण गरिएको यो फिल्म पैसाको पछि लागेका केही युवाहरुको कथा वरिपरि घुमेको छ ।

सुनील गुरुङले निर्देशन गरेको फिल्ममा सौगातका अलावा दयाहाङ राई, नम्रता श्रेष्ठ, विजय बराल, भोलाराज सापकोटा, सरिता गिरी, कमलमणि नेपाल, अनोल पाण्डे लगायतका कलाकारको अभिनय छ ।

फिल्ममा दयाहाङ राई र रामबाबु गुरुङको लगानी छ । यस्तै फिल्ममा शिवराज श्रेष्ठको छायांकन निमेश श्रेष्ठको सम्पादन तथा निर्देशक गुरुङको स्किृप्ट छ ।

कस्तो छ फिल्म?

सौगात मल्ल, अनोज पाण्डे र विजय बराललाई शीर्ष भूमिकामा अभिनय गराइएको फिल्म यिनै तीन पात्रका वरिपरि घुम्छ । पैसा कमाउने चाहनामा एकपछि अर्को समस्यामा फस्दै गएका तीन युवाले कसरी समस्यालाई समाधान गर्दै अगाडि जान्छन् भन्ने फिल्ममा देख्न सकिन्छ ।

बुधबार भएको प्रिमियरमा कलाकारले यो फिल्म मन परेको प्रतिक्रिया दिएका थिए । फिल्मको कमेडी पक्षको प्रशंसा गरिएको थियो । फिल्ममा समावेश संवाद आर्कषक भए पनि पटकथामा भने लेखकले कमाल देखाउन सकेका छैनन् ।

फिल्मको पार्श्वध्वनि र कलाकारको अभिनय औसत लाग्छ । फिल्मबाट तीन शीर्ष कलाकार सौगात, अनोज र विजयले गरेको अभिनयको तारिफ गरिएको छ ।

यद्यपि फिल्मले दर्शकको पूर्ण रुपमा मन जित्न धौ धौ पर्छ ।

योसँगै आजदेखि अर्को नेपाली चलचित्र ‘माया पिरिम’ पनि रिलिज भएको छ । फिल्मको रिलिजअघि कुनै चर्चा छैन । फिल्ममा कोशिश क्षेत्रीको शीर्ष भूमिका छ ।

यस्तै हलमा अन्य विदेशी फिल्म पनि प्रदर्शन भएका छन् ।