काठमाडौं– उपराष्ट्रपति नन्द बहादुर पुन प्रधानमन्त्री केपी शर्मा ओलीलाई भेट्न बालुवाटार पुगेका छन् ।

उपराष्ट्रपति पुन शुक्रवार विहान ‍९ बजे बालुवाटार पुगेका हुन् । उपराष्ट्रपति पुनले प्रधानमन्त्री ओलीसँग भेटगरी स्वास्थ्य अवस्थाबारे जानकारी लिएका थिए भने स्वास्थ्य लाभको कामना गरेका थिए ।

विहीवार अस्पतालबाट डिस्चार्ज भएपछि प्रधानमन्त्री ओली बालुवाटारस्थित प्रधानमन्त्रीको सरकारी निवासमा आराम गरिरहेका छन् ।

प्रधानमन्त्री ओलीको स्वास्थ्य अवस्था समान्य रहेकाले उनले निवासमै पुग्नेहरुसँग भेटघाट तथा कुराकानी गरीरहेको प्रधानमन्त्रीका प्रेस सल्लाहकार सुर्य थापाले जानकारी दिए ।

‘प्रधानमन्त्रीको स्वास्थ्य अवस्था सामान्य नै छ, आज बिहान उपराष्ट्रपतिज्यू पनि आउनु भएको थियो, निवासमा आउनेहरुसँग भेटघाट, कुराकानी भइरहेको छ,’ प्रेस सल्लाहकार थापाले भने, ‘तर भेटघाटहरुलाई कन्ट्रोल नै गरिएको छ ।’

मंसिर १० गते मनमोहन कार्डियोथोरासिक भास्कुलर तथा ट्रान्सप्लान्ट सेन्टरमा एपेन्डिक्सको शल्यक्रियापछि १० दिन आइसियुमा रहेका प्रधानमन्त्री ओलीको हिजो ( बिहीबार) डिस्चार्ज गरिएको थियो ।

प्रधानमन्त्री ओली मिर्गौलाका समेत बिरामी भएकाले चिकित्सकले अझै केही दिन आराम गरेर बस्न सुझाव दिएका थिए ।

प्रधामन्त्री ओलीलाई बालुवाटारमा पनि उनका निजी चिकित्सक दिव्यसिंह साह सहितको चिकित्सकको टोलीले निगरानीमा राखेका छन् ।
१२ वर्ष अघि मिर्गौला प्रत्यारोपण गरेको ओलीको मिर्गौलाले पुनः काम गर्न छाडेको छ । जसको कारण उनको नियमीत डायलाइसिस समेत भइरहेको छ ।

नियमित डायलाइसिसमा रहेका प्रधानमन्त्री ओलीलाई धेरै भेटघाटले संक्रमण हुने खतरा रहेको चिकित्सकले बताएका छन् ।