काठमाडौं – युवा अभिनेता प्रदीप खड्का अभिनित फिल्म ‘रोज’ गत भदौमा रिलिज भयो । फिल्म बन्ने घोषणापछि नै विवादमा फसेको ‘रोज’ को हाइप त राम्रै बनेको थियो । तर, फिल्म निर्माण भएर हलमा रिलिज भएपछि भने प्रदीपको विरोध भयो । किनकि, फिल्मको कथा नै दर्शकलाई पचेन ।

दर्शकको इग्नोरपछि भने प्रदीपले चेतेका छन् । उनले बुझेको हुनुपर्छ, फिल्म चल्न स्टारडम मात्र भएर हुँदैन । फिल्म नै राम्रो बन्नुपर्छ । टिमवर्क राम्रो हुनुपर्छ ।

त्यसो त प्रदीपले पहिलेदेखि नै छानेर फिल्म खेल्दै नआएका होइनन् । तर, उनी ‘रोज’ मा भने नराम्रोसँग चिप्लिए ।

मंगलबार काठमाडौंमा फिल्म ‘लभ स्टेशन’ को ट्रेलर सार्वजनिक कार्यक्रम थियो । उक्त कार्यक्रममा अभिनेता प्रदीप खड्का पनि आएका थिए । कार्यक्रममा बोल्दै उनले घुमाउरो पारामा फिल्म ‘रोज’ मा आफू चिप्लिएको स्वीकारे ।

त्यसैका कारण उनले फिल्म ‘लभ स्टेशन’ मा थप मेहनत गरेको पनि बताए ।

त्यसो त ‘लभ स्टेशन’ पनि चल्छ नै भन्ने पक्का छैन । तर, प्रदीपको कुरालाई आधार मान्ने हो भने यो फिल्म केही हदसम्म हेर्नलायक बनेको अनुमान गर्न सकिन्छ ।

प्रदीप खड्काले पहिलेका केही फिल्ममा चिप्लिएपछि यसपटक ‘राम्रो निर्देशक’ खोजेको बताए । ट्रेलरले रिलिजपछि त राम्रै प्रतिक्रिया पाएको छ । तर, प्रदीपले अब के राम्रा मेकरसँग मात्र काम गर्लान् त भन्ने अनुमान पनि गरिएको छ ।

कतिपयले भने ‘रोज’ मा चिप्लिएपछि प्रदीपको घैँटोमा राम्रैसँग घाम लागेको प्रतिक्रिया दिएका छन् ।