काठमाडौं– वैदेशिक रोजगार विभागले वैदेशिक रोजगार ऐनमा भएको व्यवस्था अनुसार मात्र वैदेशिक रोजगारीका लागि ल्याएको डिमाण्डको विज्ञापन गर्न रोजगार व्यवसायीलाई आग्रह गरेको छ ।

ऐन र नियमावलीभन्दा बाहिर गएर कुनै पनि म्यानपावर कम्पनीले विज्ञापन प्रकाशन गर्न नपाउने विभागले जनाएको छ ।

पछिल्लो समय सञ्चारमाध्यममा जथाभावी विज्ञापन गरेर कामदार झुक्याउने घटना बढ्दै गएको भन्दै विभागले म्यानपावर कम्पनीलाई जथाभावी विज्ञापन गरेर कामदारलाई दुःख नदिन सूचनामार्फत अपिल गरेको हो ।

विभागबाट पूर्व श्रम स्वीकृति नलिइ  पत्रपत्रिकामा आकर्षक तलव सुविधा सहितका विज्ञापन प्रकाशित गरेर रोजगारीको खोजीमा रहेका युवालाई भ्रममा पार्ने काम नगर्न भन्दै विभागले म्यानपावर व्यवसायीलाई सचेत गराएको छ ।

ऐनअनुसार विभागबाट पूर्व स्वीकृति लिएका मागपत्रका बारेमा मात्रै नेपाली भाषाको राष्ट्रिय दैनिक पत्रिकामा विज्ञापन गर्न पाइन्छ ।