एजेन्सी– भारतले कश्मीरलाई विशेष राज्यको मान्यता दिने भारतीय संविधानको धारा ३७० खारेज गर्ने भएको छ ।

भारतीय गृहमन्त्री अमित शाहले तल्लो सदन लोकसभामा सम्बोधन गर्दै धारा ३७० खारेज गरिने घोषणा गरेका हुन् । धारा ३७० कै आधारमा कश्मीर भारतमा विलय भएकाले संविधानको यही धाराका आधारमा कश्मीरलाई अरु राज्यको भन्दा अधिक स्वायत्तता रहँदै आएको छ ।

तर, सरकारको यो घोषणालाई लिएर विपक्षीहरुले भने चर्को विरोध गरेका छन् । सरकारको यही घोषणाका कारण कश्मीरमा हिंसा मच्चिनसक्ने अनुमान गरिएको छ ।

सरकारले गएरातिबाट कश्मीरका अधिकांश स्थानमा टेलिफोन, मोबाइल सेवा इन्टरनेट, टेलिभिजन, सामाजिक सञ्जाल र अन्य किसिमका सूचना र सञ्चारका क्षेत्र पूर्ण रुपमा बन्देज गरेको समाचार सार्वजनिक भएको थियो ।

यससँगै भारत सरकारको पछिल्लो घोषणा हुनुअघि प्रभावशाली कश्मीरका राजनीतिक दलका नेताहरुलाई नजरबन्दमा राखिएको समाचार आएको थियो ।