चितवन- नेपाली कांग्रेसका वरिष्ठ नेता रामचन्द्र पौडेलले पार्टीलाई जीवन्त बनाउन अहिलेको नेतृत्वको विकल्प खोज्नुपर्ने बताएका छन् । नेपाल शिक्षक सङ्घ प्रदेश नं ३ प्रथम प्रदेश प्रतिनिधिसभाको शुक्रबार रत्ननगरमा उद्घाटन गर्दै पौडेलले पार्टी सभापति शेरबहादुर देउवाको विकल्प कांग्रेसले खोजेको बताए ।

पौडेलले अहिले आम नागरिकले सरकारको नेतृत्वको र कांग्रेसले पार्टीको नेतृत्वको विकल्प खोजेको बताए । पार्टीभित्र समयमानै निर्वाचन गरेर पार्टीलाई जीवन्त बनाउन नेतृत्वको खोजी गर्नुपर्ने समय आएको पौडेलको भनाइ थियो । पार्टीका कार्यकर्तामा नैरास्यता छाएको भन्दै उनले समयमै महाधिवेशन गरेर नेतृत्व परिवर्तनको आवश्यकता भएको प्रष्ट पारे ।

नेपालमा समृद्धि कांग्रेसलेनै दिनसक्ने भएकाले आम जनताको चाहना कांग्रेसको नेतृत्व देख्ने रहेको पौडेलको भनाइ थियो । उनले शैक्षिक पाठ्यक्रममा सुधारको आवश्यकता रहेको बताए । देश बनाउने जिम्मेवारी शिक्षा क्षेत्रबाट शुरु हुने भन्दै अहिलेको पाठ्यक्रममा सुधारको आवश्यकता रहेको बताए ।