काठमाडौं– रोजगारीका लागि मलेसिया जाने कामदारको स्वास्थ्य परीक्षण गर्ने मेडिकलको छनोट भएको छ ।

मलेसिया सरकारले नेपालबाट कामदार लिदाँ आवश्यक पर्ने मापदण्ड पुरा गर्ने संस्थालाई छनोट गरी नामवाली उपलब्ध गराएको श्रम, रोजगार तथा सामाजिक सुरक्षा मन्त्रालयले जानकारी दिएको छ ।

नेपालले २ सय ९० वटा मेडिकलको नामवाली मलेसिया पठाएको थियो । जसमध्ये ९९ वटा मेडिकल संस्था मलेसियाले छनोट गरेर नामावली पठाएको मन्त्रालयले जानकारी दिएको छ । यससँगै स्वास्थ क्षेत्रमा देखिएको सिन्डिकेट तोडिएको छ ।

मलेसिया जाने कामदारको विगतमा ३८ वटा मेडिकलले मात्र स्वास्थ्य परीक्षण गराउँदै आएका थिए ।

गत वर्ष जेठमा मलेसिया जाने कामदार माथि आर्थिक भार थप्दै आएका विभिन्न सस्था बन्द गरेपछि मलेसिया रोजगारीका लागि कामदार जाने प्रक्रिया नै बन्द थियो ।

स्वास्थ्य तथा अन्य प्रक्रियाका विषयमा कुरा नमिलेपछि कात्तिक १२ गते श्रम सम्झौता भएपनि रोजगारीका लागि मलेसियाको जाने प्रकृया खुलेको छैन ।

मलेसिया स्वास्थ्य परीक्षण गराउने संस्थाको नामवाली उपलब्ध गराएपछि अब मलेसियाको रोजगारी खुल्ने सम्भावना बढेको छ ।