काठमाडौं– धुर्मुस सुन्तली फाउण्डेसनका अध्यक्ष सीताराम कट्टेल ‘धुर्मुस’ले निर्माणधीन गौतमबुद्ध अन्तर्राष्ट्रिय रंगशालाका विषयमा धारणा फेसबुकमार्फत सार्वजनिक गरेका छन् । रंगशाला निर्माणकै क्रममा केही समूहले रंगशालाको बार भत्काएपछि आएका समाचार र टिका टिप्पणीप्रति आफ्नो गम्भिीर ध्यानाकर्षण भएको भन्दै विनास र ध्वंसमा लाग्ने उर्जा विकासमा लगाउन आग्रह गरेका छन् ।

उनले सामाजिक सञ्जाल फेसबुकमा निकै लामो स्टाटस लेखेका छन् । स्टाटसमा लेखिएको छ– ‘त्यति धेरै गरीवका घर, पीडितका बस्ती बनाईरहँदा केही भुँमिहिनहरुलाई जग्गा खरिद गरेर समेत एकीकृत नमुना बस्ती बनाएर आएका अभियान्ता भएको हुनाले कसैको घर ध्वस्त पार्ने, जग्गा रित्याउने र कसैलाई सुकुम्वासी बनाउने बिल्कुलै मनसाय होईन् ।’

उनले रङ्गशाला निर्माणकै कारणले कसैको जग्गा जाने, कसैको घर उठिवास हुने अवस्था नरहेको पनि जानकारी गराएका छन् । उनले आफूहरुको संकल्प कसैलाई सुकुम्बासी बनाउन, नकारात्मक प्रभाव पार्ने उद्देश्यले नभएर सबैको हितलाई केन्द्रमा राखेर गरिएको स्पष्ट पारेका छन् ।

उनले काममा बाधाव्यवधान नआउने हो भने भनेकै मितिमा पूरा गर्ने समेत जनाएका छन् । ज्ञानबस वा अज्ञानताबस जसले यो गल्ती गरेको भए पनि आगामी दिनमा नगरिदिनुहुन उनले अनुरोध गरेका छन् ।

उनले रंगशालाको पक्ष र विपक्ष भएर एउटै परिवारका हामी सबै नेपाली विभाजन नभइदिन र अनावश्यक झैझगडामा नलागीदिन सबैँमा आग्रह गरेका छन् ।

अन्त्यमा उनले लेखेका छन्– ‘जे नहुनु थियो त्यो भयो । अब त्यसमा पछुतो, वादविवाद र टिकाटिप्पणी गरेर घटनालाई गिजोल्ने गरेर समय व्यतित गर्नुभन्दा आगामी दिनमा यस्तरी कसैको पसिनाको अपमान हुने र अरु कसैको नोक्सानी हुने काममा नलागीदिन र अभियानको अभियान्ता बनिदिनुहुन पनि हामी सम्पूर्णमा आह्वान गर्दछौँ ।’