अहिले स्मार्टफोन उत्पादनकर्ताबीच सबैभन्दा उत्कृष्ट क्यामेरासहितको फोनका लागि प्रतिस्पर्धा भइरहेको छ । खास गरेर दक्षिण एसियाली बजारहरुमा चिनियाँ मोबाइल उत्पादक कम्पनीबीच नै आफ्ना उत्पादन बिक्री गर्ने होड चलिरहेको हुन्छ ।

विश्व मोबाइल बजारमा आफ्नो प्रभाव विस्तार गर्दै गइरहेको चिनियाँ मोबाइल उत्पादक कम्पनी शाओमीले नेपालमा ४८ मेगापिक्सल क्यामेरासहितको फोनको बिक्री शुरु गरेको छ ।

शाओमी (एमआई)ले ४८ मेगापिक्सल क्यामेरायुक्त रेडमी नोट–७ फोनको बिक्री नेपालमा शुरु गरिसकेको छ । यो फोन तीन फरक भेरियन्ट्समा नेपालमा उपलब्ध हुने छ ।

यो फोनमा ४८ र ५ मेगापिक्सलका २ वटा रियर क्यामेरा छन् । सेल्फीका लागि १३ मेगा पिक्सलको क्यामेरा दिइएको छ ।

यसको अर्को राम्रो विशेषता भनेको ४००० एमएएच क्षमताको ब्याट्री हो । साथै यो फोनमा फास्ट चार्जिङ सपोर्ट पनि उपलब्ध छ ।

शाओमीले अन्य फोनको तुलनामा रेडमी नोट–७ को डिजाइनलाई पनि विशेष रुपमा तयार पारेको छ । शाओमीले यस फोनका लागि प्रिमियम ग्लास स्यान्डबिच डिजाइन प्रयोगमा ल्याएको छ । फोनको अगाडि र पछाडि दुवैतर्फ गोरिल्ला ग्लास ५ को प्रोटेक्शन छ ।

डिस्प्लेको कुरा गर्दा यसमा ६.३ फूल एचडीका साथ डट नच उपलब्ध छ ।

शाओमीले यो फोनमा क्वालकम स्न्यापड्रागन ६६० एआइई प्रोसेसर उपलब्ध गराएको छ ।

र्‍याम र इन्टरनल स्टोरेजका आधारमा शाओमीले यो फोनलाई नेपालमा ३ अलग भेरियन्टमा उपलब्ध गराएको छ ।

४ जीबी र्‍याम र १२८ जीबी इन्टरनल स्टोरेज क्षमता भएको फोनको मूल्य नेपाली बजारका लागि २६ हजार ९ सय ९९ रुपैयाँ तोकिएको छ । यस्तै ४ जीबी र्‍याम र ६४ जीबी इन्टरनल स्टोरेज क्षमता भएको फोनको मूल्य २४ हजार ९ सय ९९ रुपैयाँ तोकिएको छ । यस्तै ३ जीबी र्‍याम र ३२ जीबी इन्टरनल स्टोरेज क्षमता भएको फोनको मूल्य २१ हजार ९ सय ९९ रुपैयाँ तोकिएको छ ।