काठमाडौं- प्रश्नपत्र आउटपछि स्थगित भएको माध्यमिक शिक्षा परीक्षा आज (शुक्रबार)देखि शुरु भएको छ । लगातार प्रश्नपत्र बाहिरिएपछि प्रदेश २ मा सञ्चालित परीक्षा स्थगित गरिएको थियो । नयाँ तालिका अनुसार आज (शुक्रबार) विज्ञान विषयको परीक्षा सञ्चालन भएको छ ।

त्यस्तै चैत २३ गते सामाजिक, २४ गते जनसङ्ख्या तथा वातावरण, २५ गते ऐच्छिक प्रथम, २६ गते ऐच्छिक द्वितिय, २७, २८ र २९ गते प्राविधिक तर्फका विषयहरुको परीक्षा सञ्चालन हुनेछ ।

प्रदेश २ का ८ वटै जिल्लामा स्थगित भएको परीक्षा पुन: सञ्चालन गरिएको हो । प्रदेश २ मा जम्मा २ सय ६३ परीक्षा केन्द्र छन् । परीक्षा दिने विद्यार्थीको संख्या ७२ हजार ४९ छ ।

परीक्षालाई मर्यादित र व्यवस्थित बनाउन परीक्षा निरीक्षक, सुरक्षाकर्मी, कर्मचारी र सहयोगीसहित सबैलाई मोबाइल निषेध गरिएको छ ।

बिहीबार बसेको प्रदेश २ माध्यमिक शिक्षा परीक्षा सञ्चालन समन्वय समितिको बैठकले परीक्षा केन्द्रमा खट्ने केन्द्राध्यक्ष बाहेक सबैलाई मोबाइल प्रयोग निषेधको साथै सम्पूर्ण विद्यार्थीलाई परीक्षाकेन्द्रमा प्रवेश गर्ने बेला अनिवार्य खानतलासी गर्न निर्देशन दिएको छ ।

यसअघि विज्ञान र समाजिक विषयको परीक्षा पूर्व नै पश्नपत्र आउट भएपछि राष्ट्रिय परीक्षाबोर्डले दुवै विषयको परीक्षाको साथै अन्य बाँकी विषयको परीक्षासमेत स्थगित गरेको थियो ।

प्रश्नपत्र आउट गर्न सुरक्षाकर्मी नै लागेको खुलासा भएको छ । प्रश्नपत्र आउट गरेको आरोपमा पक्राउ परेका प्रहरीलगायत संलग्नलाई बिहीबार सार्वजनिक गरिएको थियो ।