काठमाडौं – नेपाली आर्चरी टोली अहिले ओलम्पिक २०२० को तयारीका लागि जापानमा अभ्यास गरिरहेको छ।

नेपाली टोलीले अगस्ट १ देखि आगामी सेप्टेम्बर ३ सम्म जापानको ओसाकाको टोकोसि शहर अभ्यास गर्नेछ ।

नेपालबाट अभ्यासका लागि आर्चरीसँगका ४ जना खेलाडी र एक जना प्रशिक्षक गरि पाँच जना सहभागी भएका छन् ।

जसमध्ये २ जना पुरुष खेलाडी र २ जना महिला खेलाडी रहेको आर्चरी संघका अध्यक्ष तथा प्रशिक्षक दिपक गुरुङले बताए ।
उनले नेपाली टोलीले जापानमा गरेको अभ्यासले काठमाडौं र पोखरामा आयोजना हुने १३ औं दक्षिण एसियाली खेलकुद प्रतियोगितामा प्रत्यक्ष सहयोग गर्ने बताएका छन् ।

‘यहाँ अभ्यास राम्रो भइरहेको छ । खेलाडीको फिजिकल फिटनेश देखि सबै कुरा सेड्युल अनुसार भइरहेको छ । नेपालमा भन्दा यहाँ अभ्यास गर्न सहज छ,’ प्रशिक्षक गुरुङले भने,‘यो अभ्यास खासमा हामीले ओलम्पिक २०२० का लागि भनेर शुरु गरेका हौं । तर, पनि यसले प्रत्यक्ष रुपमा सागलाई सहयोग गर्नेछ ।’

सागका लागि आर्चरीबाट १६ जना खेलाडी सहभागी हुनेछन् । जसमध्ये अहिले ४ जना जापानमा रहेका खेलाडी र बाँकी रहेका ८ जना खेलाडी अब केही दिनभित्रै अभ्यासका लागि पोखरा जाने प्रशिक्षक गुरुङले बताए । काठमाडौंको हल्चोकमा अभ्यास गरिरहेका आर्चरी खेलाडी सागको अभ्यासका लागि पोखरामा रहेको आर्चरीको ‘कोर्ट’ मा अभ्यास गर्नेछन् ।