काठमाडौं– काठमाडौंमा जारी प्रधानमन्त्री कप क्रिकेट प्रतियोगिताको सेमिफाइनल समिकरण पूरा भएको छ । सेमिफाइनलमा तीन वटा विभागीय टोली र प्रदेश–३ ले स्थान बनाएका छन् । सेमिफाइलनको पहिलो खेल बुधबार हुनेछ ।

जसमा समूह ए को विजेता प्रदेश नम्बर ३ र समूह वी को उपविजेता त्रिभुवन आर्मी क्लबले पहिलो सेमिफाइनलमा प्रतिस्पर्धा गर्नेछन् भने बिहीबार समूह ए को उपविजेता शसस्त्र प्रहरी बलको एपीएफ क्लब र समूह बी को विजेता नेपाल पुलिसबीच फाइलन प्रवेशका लागि भिडन्त हुनेछ ।

नेपालमा हुने एक मात्र एकदिवसीय क्रिकेट प्रतियोगितामा राष्ट्रिय क्रिकेट टोलीका अधिकांश खेलाडीले खेलेका छन् । उनीहरु विभिन्न टिमबाट प्रतियोगिताबाट सहभागी भइरहँदा राष्ट्रिय क्रिकेट टोलीका कप्तान पारस खड्का र उपकप्तान ज्ञानेन्द्र मल्ल, प्रदेश नम्बर ३ बाट खेलिरहेका छन् ।

नेपाली खेलकुदमा महत्वपूर्ण भूमिका खेलेका विभागिय क्लबहरुले अधिकाशं प्रतियोगितामा उपाधि उचाल्दै आएका छन् । कतिपय प्रतियोगिताहरुमा त विभागीय टोलीबीच नै कडा प्रतिस्पर्धा हुने गरेको छ ।

पीएम कप क्रिकेटमा पनि सेमिफाइनलमा ३ विभागीय टोली पुग्दा प्रदेशतर्फको प्रतिनिधित्व प्रदेश नम्बर ३ ले गरिरहेको छ । कप्तान खड्का र उपकप्तान मल्ल रहेको प्रदेश ३ समूह ए को विजेता बन्दै सेमिफाइनलमा पुगेको हो ।

सेमिफाइनलमा अन्य तीनवटै टोली विभागीय रहेका छन् । यसर्थ प्रदेश ३ लाई प्रादेशिक टिमहरुमा सबैभन्दा बलियो टोलीका रुपमा हेरिएको छ भने प्रदर्शन पनि उत्तिकै राम्रो गरेको छ । कप्तान र उपकप्तानले प्रदेशको टिमबाट खेल्नुका पछाडि उनीहरुले प्रादेशिक टोलीलाई बलियो बनाउने लक्ष्य रहेको यसअघि नै बताइसकेका छन् ।

प्रतियोगितामा अन्य प्रादेशी टोलीमा प्रदेश नम्बर ५ र प्रदेश नम्बर २ ले समान दुई खेल जित्दा सुदुरपश्चिम प्रदेश र प्रदेश नम्बर १ ले मात्रै एक खेल जिते भने गण्डकी प्रदेशको टोली र कर्णाली प्रदेशले प्रतियोगितामा एउटा पनि खेल जित्न सकेनन् ।

यसको मतलब, देशभरका उत्कृष्ट खेलाडीहरु विभागीय टोलीमा रहँदा प्रादेशिक टोलीले आफ्नो पक्षमा नतिजा पार्न असफल रहे । पीएम कप क्रिकेटमा राष्ट्रिय टोलीका खेलाडीहरुको प्रदर्शन औसत रहेको छ । कप्तान खड्का र दीपेन्द्रसिंह ऐरीले बलिङमा राम्रो गरेका छन् ।

जसमा ऐरीले ४ खेलमा १३ विकेटसहित शीर्ष स्थानमा रहँदा ललित नारायण राजवंशी १२ विकेटसहित दोस्रो स्थानमा छन् । यस्तै, कप्तान खड्काले १० विकेट लिएका छन् ।

समूह चरणमा खेलाडीहरुको प्रदर्शन

एकै खेलमा धेरै रन प्रहार गर्ने ५ खेलाडी
नाम                     रन
ज्ञानेन्द्र मल्ल        ११७
अनिल गुरुङ       ११५
अमित श्रेष्ठ           १०६
सुमित महर्जन      ९४
राजु रिजाल          ९०