काठमाडौं- हामी उठ्ने छौँ फाउण्डेशनले आयोजना गरेको मेरो गाउँ मेरो ठाउँ भिडियो च्यालेन्जमा १२० भिडियो आवेदन परेको छ ।
संस्थाले नेपालका गाउँको पर्यटन प्रवर्द्धन गर्ने उद्देश्यले आयोजना गरेको भिडियो च्यालेन्समा सबै प्रदेशबाट भिडियो प्राप्त गरेको संस्थाका निर्देशक निर्मल श्रेष्ठले खबरहबलाई बताए ।

संस्थाले प्राप्त भिडियोमध्ये उत्कृष्ट २० भिडियो सामाजिक सञ्जालमार्फत सार्वजनिक गर्ने जानकारी दिएको छ । उत्कृष्ट भिडियो, पिपुल्स च्वाइस अर्वाड, उत्कृष्ट सम्पादन र उत्कृष्ट पटकथामा सम्मानित गर्ने संस्थाले जनाएको छ ।

उत्कृष्ट भिडियो र पिपुल्स च्वाइस अवार्डले १ लाख नगद पुरस्कार, उत्कृष्ट सम्पादनले २५ हजार, उत्कृष्ट पटकथा २५ हजार, उत्कृष्ट भिडियो दोस्रोले ५० हजार र तेस्रोले २५ हजार रुपैयाँ प्राप्त गर्नेछन् । त्यस्तै, उत्कृष्ट भिडियो र पिपुल्स च्वाइस अवार्डका विजेताले नेपाल फिल्म एकेडेमीबाट २ लाख बराबरको छात्रवृत्ति पनि प्रदान गरिनेछ ।

यस भिडियो च्यालेन्जको निर्णायक मण्डलमा वृत्तचित्र निर्देशक छिरिङ्ग रितार शेर्पा, लेखक मोहन मैनाली, पर्यटन बोर्डका प्रमुख कार्यकारी अधिकृत दिपक राज जोशी, वरिष्ठ ध्वनी विज्ञ प्रदीप उपाध्याय र चलचित्र निर्देशक सम्झना उप्रेती रौनियार रहेका छन् । संस्थाले एक कार्यक्रममको आयोजना गरी विजेतालाई असार १६ गते पुरस्कृत गर्दैछ ।