काठमाडौं– नेपाल मिडिया सोसाइटीले प्रेसलाई नियन्त्रण गर्ने आदेश तत्काल सच्याउन सरकारसँग आग्रह गरेको छ । सोसाइटीका अध्यक्ष शुभशंकर कँडेलले एक विज्ञप्ति जारी गर्दै लोकतन्त्रमा सरकार वा सत्ताभन्दा ठूला जनता हुने भन्दै जनताको अभिव्यक्ति गर्ने माध्यम मिडियालाई कुनै अंकुश र नियन्त्रणमा राख्न नहुने बताए।

जनताको अभिव्यक्ति स्वतन्त्रताको सम्मान गर्दै प्रेस विरोधी, प्रेसलाई नियन्त्रण गर्ने कुनै पनि प्रकारका आदेश र निर्देशनहरु तत्काल सच्याएर ‘समृद्ध नेपाल सुखी नेपाली‘ को महाअभियानबाट नेपाली मिडियालाई विमुख नबनाउन प्रधानमन्त्रीलाई आग्रह गरे ।

सञ्चारसँग सरोकार राख्ने संघ, संस्था र संगठनसहित सबै लोकतान्त्रिक राजनीतिक दललाई समेत लोकतन्त्रको सबैभन्दा ठूलो गहना प्रेस स्वतन्त्रतामाथि मडारिन थालेको कालो बादलको बारेमा सचेत रहन विज्ञप्ती मार्फत आग्रह गरिएको छ ।