काठमाडौं– सरकारले बुधबारदेखि विराटनगरबाट पनि पुनः श्रम स्वीकृति जारी गर्ने भएको छ । पुनः श्रम स्वीकृतिको सेवा सम्बन्धित प्रदेशबाटै दिने सरकारको निर्णय अनुसार सरकारले प्रदेश १ को विराटनगरबाट पुनः श्रम स्वीकृति बुधबारबाटै जारी गर्ने श्रम, रोजगार तथा सामाजिक सुरक्षा मन्त्रालयले जानकारी दिएको छ ।

विराटनगरमा रहेको श्रम तथा रोजगार कार्यालयबाट सेवा सुरु गरिने मन्त्रालयले जनाएको छ । यसका लागि प्राविधिकसहित सबै तयारी पूरा भइसेको मन्त्रालयको भनाइ छ । योसँगै ७ वटै प्रदेशबाट वैदेशिक रोजगारीमा गई घर विदामा आएका कामदारले पुनः श्रम स्वीकृतिका सम्बन्धित प्रदेशबाट सुविधा लिन पाउने छन् । सातै प्रदेशबाट पुनः श्रम स्वीकृति जारी गर्ने शुरु गरिएसँगै काठमाडौं आउनुपर्ने बाध्यता अन्त्य पनि भएको छ ।

श्रम, रोजगार तथा सामाजिक सुरक्षा मन्त्रालयले यसअघि प्रदेश नम्बर २ को जनकपुर, प्रदेश नम्बर ५ को बुटवल, गण्डकी प्रदेशको पोखरा, कर्णाली प्रदेशको सुर्खेत र सुदूरपश्चिम प्रदेशको अस्थायी राजधानी धनगढीमा रहेको श्रम तथा रोजगार कार्यालयबाट सेवा उपलब्ध गराउन काम थालिसकेको छ ।

यस्तै, वैदेशिक रोजगारी सम्बन्धी ईजाजत पाएका संस्थाहरु र तालिम एवं अभिमुखीकरण संस्थाहरुको अनुगमन गर्ने, सरोकारवालाहरुबीच वैदेशिक रोजगारीको सूचना तथा जानकारी सम्प्रेषण गर्ने एवं गुनासो सुनुवाई गरी सेवा प्रवाहलाई सहजीकरण गर्ने जस्ता काम प्रदेशकै कार्यालयबाट हुने मन्त्रालयले जानकारी दिएको छ ।