काठमाडौ–विश्व सम्पदाका लाागि नेपालबाट युनेस्कोले तयार पारेको १० वटा सूचीमा प्रदेश नम्बर २ बाट एउटा पनि नपर्नु दुर्भाग्यपूर्ण भएको भन्दै नेकपा नेता प्रभु साहले आपत्ति जनाएका छन् ।

नेपाल कम्युनिष्ट पार्टी प्रदेश नम्बर २ का अध्यक्ष प्रभु साहले प्रदेशमा ऐतिहासिक, सांस्कृतिक र धार्मिक महत्वका थुप्रै सम्पदाहरु हुँदाहुँदै युनेस्कोले कुनै एकलाई पनि अन्तर्राष्ट्रिय मान्यता नदिनु विभेद भएको बताएका हुन् ।

साथै उनले बाराको गढीमाई र जानकी मन्दिरलाई युनेस्कोको विश्व सम्पदा सूचीमा राख्न माग गरेका छन् । प्रत्येक पाँच वर्षको अन्तरालमा लाग्ने विश्वकै ध्यान केन्द्रित गर्ने र लाखौं तिर्थालु एवम पर्यटकको आगमन हुने ऐतिहासिक गढीमाई क्षेत्रलाई विश्व सम्पदामा सूचीकृत गराउन पहल गर्न सरकारसंग माग गरेका छन् ।

“हाम्रो प्रदेशमा गढीमाई, सिम्रौनगढ, जानकी मन्दिरलगायत धार्मिक महत्व बोकेको ऐतिहासिक धरोहरहरु छन् । प्रदेश नम्बर २ हरेक हिसाबले सम्पन्न छ । चाहे धार्मिक रुपमा होस चाहे सांस्कृतिक रुपमा होस या चाहे ऐतिहासिक धरोहरहरुको उपलब्धता होस् । त्यती हुँदाहुँदै पनि कुनै वास्ता नगरिनु युनेस्कोको विभेदकारी काम हो । त्यसैले म आग्रह गर्न चाहन्छु कि कम्तिमा गढीमाई र जानकी मन्दिरलाई विश्व सम्पदामा समेटियोस ।” अध्यक्ष साहले भने ।

अध्यक्ष साहले थपे, “गढीमाईको पौराणिक इतिहास त छदैछ साथसाथै विश्वकै ध्यान केन्द्रित गर्ने महामेला पनि लाग्ने गर्दछ । विशेष ऐतिहासिक भुमी सिम्रौनगढ र मधेशको फरक संस्कृतिको प्रतिनिधित्व गर्ने गढीमाईलाई विश्वसम्पदाको रुपमा स्थापित गर्न सके यसले मधेशको गौरव बढाउनेछ । त्यसैले सरकार र युनेस्कोले यसमा पहल गरिदिन अनुरोध गर्दछु ।”

हाल नेपालका १० वटा सम्पदा युनेस्कोले सुचीकृत गरेको छ जसमध्ये प्रदेश नम्बर २ मा एउटा पनि परेको छैन ।