काठमाडौं – धितोपत्र बजारमा शेयर कारोबार मापक नेप्से परिसूचक झण्डै सात अङ्कले घटेको छ । नेपाल स्टक एक्सचेञ्जका अनुसार नेप्से ६.८८ विन्दुले घटेर एक हजार १३९.२९ विन्दुमा झरेको छ ।

यस्तै सेन्सेटिभ परिसूचकसमेत १.६२ विन्दुले घटेर २५०.४६ विन्दुमा ओर्लेको छ । नेप्से ओरालो लागेसँगै कारोवार रकमसमेत सस्तैमा समेटिएको छ । कूल १६१ कम्पनीका सात लाख ८४ हजार ७४० कित्ता शेयर रु १७ करोड ५५ लाख ४४ हजार ४७२ मूल्यमा खरीद बिक्री भएका छन् ।

स्टकका अनुसार कारोवार भएका कूल ११ उपसमूहमध्ये आज सामूहिक लगानी कोषकोबाहेक अरु सबै उपसमूहका शेयर ओरालो लागेका छन् । सामूहिक लगानी कोष ०.०१ विन्दुले बढेको छ । यस्तै बैंकिङ ६.७८, होटल ४.२२, विकास बैंक १.५८, जलविद्युत् २.४९, वित्त २.५, निर्जीवन बीमा ३२.२५, उत्पादन ३७.३५, अन्य ५.२९, लघुवित्त ३ र जीवन बीमा २६.०७ विन्दुले घटेको छ ।

कारोवारका आधारमा प्रभु बैंक शीर्ष स्थानमा छ । सो बैंकको रु एक करोड ५२ लाख ४५ हजार ८९३ मूल्यमा कारोवार भयो । यस्तै देवः विकास बैंक रु एक करोड ४३ लाख ७८ हजार ८००, मेगा बैंक रु ७९ लाख ४९ हजार ४५२, नवील बैंक रु ६० लाख ७२ हजार १०७ र नेपाल बैंक रु ५१ लाख ८२ हजार ६४७ बराबरको कारोवार भई शीर्ष स्थानमा रहे ।

स्टकका अनुसार एनआइसी एशिया ग्रोथ फण्ड ४.५२, बरुण हाइड्रोपावर ४.४०, चिलिमे जलविद्युत् कम्पनी २.९१, पाँचथर पावर २.३१ र रैराङ हाइड्रोपावरका शेयरधनीले दुई प्रतिशतले कमाए । त्यस्तै, मेगा बैंक ५.४४, आँखु खोला जलविद्युत् कम्पनी ५.२६, नेपाल सेवा लघुवित्त वित्तीय संस्था ५.०६, युनाइटेड मोदी ४.७६, एनएमबी माइक्रोफाइनान्स वित्तीय संस्था ४.०६ र प्रिमियर इन्स्योरेन्स कम्पनीका शेयरधनीले ३.८१ प्रतिशतले गुमाए ।