काठमाडौं– विप्लव नेतृत्वको प्रतिबन्धित नेपाल कम्युस्टि पार्टी(नेकपा)ले प्रहरीविरुद्ध नै पक्राउ पुर्जी जारी गरेको छ ।

जनअदालतका प्रमुख विकासको नाममा विज्ञप्ति जारी गर्दै नेकपाले प्रहरी विरुद्ध पक्राउ पुर्जी जारी गरेको हो ।

सुराकी गरेर स्थानीय नेता कार्यकर्ता र जनतालाई दुख दिएको भन्दै नेकपा कैलालीले बर्दगोरिया गाउँपालिका १ बस्ने नेपाल प्रहरीका असई भैरव कुँवरविरुद्ध २५ दिने पक्राउ पुर्जी जारी गरेको हो ।

पक्राउ पुर्जीमा जनाइए अनुसार तुफानकुमार साउदको जाहेरिपछि जिल्ला जनसरकारले छानबिन गरी प्रहरी असई कुवरलाई पक्राउ गर्नुपर्ने प्रतिवेदन पेश गरेकाले पक्राउ पुर्जी जारी गरिएको जनाइएको छ ।

देश र जनताको हितबिपरित नेकपाका नेता कार्यकर्ताको सुराकी, अपहरण ज्यानमार्ने उद्योगसम्बन्धी कसुर गरेको भनी जाहेरी परेका कारण बाटोम्याद बाहेर २५ दिनभित्र पक्राउ गरेर ल्याउन विज्ञप्तिमा भनिएको छ ।

‘देश र जनाताको हित विरुद्ध फौजदारी कार्य विधी संहिताको दफा ४८ को उपदफा ६ सँग सम्बन्धित’ भन्दै जारी गरिएको विज्ञप्तिमा तोकिएको समयमा आफैं वा पक्राउ पुर्जी बमोजिम पक्राउ परि यस जनअदालतमा हाजिर हुन आउन आदेश दिइएको छ ।

हाजिर हुन आए उनको व्यवहार समेत बुझि जनअदालतको कानुन बमोजिम कारवाही हुने उल्लेख गरिएको छ । विज्ञप्तिमा भनिएको छ– नआई यो म्याद गुजारी फरार रहेर फेरि देश र जनताको विरुद्ध नेता कार्यकर्ताको सुराकी अपहरण, हत्या, यातनामा संलग्न भए जिल्ला जनसुरक्षा विभागलाई जुनसुकै बेला पनि कारवाही गर्न पनि आदेश दिइएको छ ।’

पक्राउ पुर्जीको वेवास्ता गर्ने र अपहरण, यातना, सुराकी लगायतका काममा संलग्न भए जुनसुकै बेलापनि इन्काउन्टर गर्न सकिने चेतावनी विप्लवको जिल्ला जनसुरक्षा विभाग कैलालीले जारी गरेको विज्ञप्तिमार्फत दिइएको छ ।