दुबई– हालै संयुक्त अरव इमिरेट्स (यूएई) अन्तर्गतको शारजाह इमिरेटका राजकुमार आफैले आयोजना गरेको एक आलिशान पार्टीमा रासलीला मच्चाउँदा ज्यान गएको छ ।

३९ वर्षे राजकुमार शेख खालिद बिन सुल्तान अल कशिमीले लण्डनस्थित एक आलिशान अपार्टमेन्टमा उक्त पार्टीको आयोजना गरेका थिए । लण्डनको नाइटब्रिज क्षेत्रमा रहेको उक्त अपार्टमेन्टमा गरिएको सो पार्टीमा राजकुमारले विभिन्न अवैध औषधीहरुको अत्याधिक सेवन गरेका थिए । सोही कारण उनको ज्यान गएको प्रहरीले पुष्टि गरेको छ ।

घटनापछि प्रहरीले सो ठाउँमा अवैध औषधीहरु फेला पारेको थियो । पार्टीमा सहभागीहरुले यौनजन्य गतिविधि समेत गरेको प्रहरीले जनाएको छ । राजकुमार शेख खालिद बिन सुल्तान अल कशिमीको बुधबार अन्त्यष्टि गरिएको छ । शारजाहका शासक डा. सुल्तान बिन मोहम्मद अल कशिमीको रोहबरमा किङ फैसाल मस्जिदमा उनको अन्त्येष्टि गरिएको हो ।

अन्त्यष्टिमा हजारौं मानिसको सहभागिता थियो । उनको निधनपछि शारजाह सरकारले तीन दिनका लागि राष्ट्रिय शोकको घोषणा गर्दै झण्डा आधा झुकाउने जनाएको छ । शारजाहमै जन्मेर ९ वर्षको उमेरदेखि उनी बेलायतमा बसोबास गर्दै आएका थिए । उनले बेलायतको केन्टस्थित प्रतिष्ठित टोनब्रिज विद्यालय, इम्पेरियल कजेल लण्डन र सेन्ट्रल सेन्ट मार्टिन्सको आर्ट स्कूलमा अध्ययन गरेका थिए । सन् २००८ मा उनले कशिम ओम नामक कपडा ब्राण्ड समेत स्थापना गरेका थिए ।