बुटवल– कपिलवस्तुको कृष्णनगर घटनाका मुख्य आरोपी जमाल शाहलाई प्रहरीले शनिबार दिउँसो पक्राउ गरेको छ ।

लक्ष्मीपूजाको मूर्ति विर्सजन यात्रामा विवाद निकालेर झडपको अवस्था निम्त्याएको आरोपमा प्रहरीले उनलाई कृष्णनगरस्थित आफ्नै निवासबाट पक्राउ गरेको हो ।

पक्राउ परेका उनलाई सदरमुकाम तौलिहवास्थित जिल्ला प्रहरी कार्यालयमा ल्याइएको जिल्ला प्रहरी प्रमुख एवं एसपी दीप शमशेर जबराले जानकारी दिए । उनीमाथि अदालतबाट म्याद थप गरी अनुसन्धान थालिने एसपी जबराले बताए ।

जमाल शाहलाई पक्राउ गरी कारवाही गर्न कपिलवस्तुका सांसद अभिषेकप्रताप शाहले गृहमन्त्रीलाई ज्ञापनपत्र नै बुझाएका थिए ।

बुधबार लक्ष्मीपूजाको मूर्ति बिसर्जन र्‍यालीलाई प्रहरीले मुस्लिम वाहुल्य वस्तीबाट नलैजान आग्रह गरेको विषयलाई लिएर भएको विवादले उग्ररुप लिंदा कृष्णनगरमा कर्फ्यु लगाइएको थियो ।

कर्फ्युकै क्रममा भएको झडपमा कृष्णनगरमा व्यवसाय गर्दै आएका भारतीय नागरिक २० वर्षीय सुरजकुमार पाण्डेको गोली लागेर मृत्यु भएको थियो । बिहीबार बिहान ११ बजेदेखि कृष्णनगरमा लगाइएको कर्फ्यु भने शनिबार बिहान ६ बजेबाट हटाइएको छ ।