काठमाडौं – नायिका स्वस्तिमा खड्का अभिनित फिल्म ‘बुलबुल’ प्रणय दिवसको अवसर पारेर गत वर्ष  रिलिज भयो । उक्त फिल्ममा उनले गरेको अभिनयको खुबै तारिफ भयो । यही फिल्मबाट स्वस्तिमाले सार्क फिल्म फेस्टिभलमा समेत अवार्ड हात पारिन् । सोही फिल्मले उनलाई नेपालको राष्ट्रिय अवार्ड पनि दिलायो ।

त्यसो त राष्ट्रिय अवार्ड विवादमा नपरेको होइन । यद्यपि ‘बुलबुल’मा स्वस्तिमाले गरेको अभिनयलाई लिएर धेरैले उनी चाहिँ साँच्चिकै अवार्डका लागि दाबेदार भएको समीक्षा समेत गरे ।

अहिले उनी अभिनित फिल्म ‘हजार जुनीसम्म’ को चर्चा छ । यो फिल्मबाट पनि स्वस्तिमाले धेरै आशा गरेकी छिन् । ट्रेलरमा उनको कामले तारिफ पाएको छ । ‘बुलबुल’ पछि स्वस्तिमाको अभिनय मन पराएका धेरैले उनको फिल्मको प्रतीक्षा नगर्ने कुरै भएन । पहिले फिल्ममा अभिनय नखोज्ने दर्शकले पनि अहिले अभिनयको आशा गर्न थालेका छन् ।

स्वस्तिमाको फिल्ममा दर्शकले आशा गर्नु स्वभाविक पनि हो । यो फिल्ममा उनको कस्तो भूमिका रहनेछ भन्नेले त खासै फरक नपार्ला तर फिल्ममार्फत उनले दर्शकमाझ कस्तो क्रेज बनाउनेछिन्, त्यो भने हेर्न बाँकी छ । बुलबुलबाट चर्चा कमाएकी स्वस्तिमाले यो फिल्मबाट कस्तो छाप छाड्लिन् त दर्शकमाझ ?