काठमाडौं– उपप्रधानमन्त्री तथा रक्षामन्त्री ईश्वर पोखरेलले नेपाली सेना र प्रहरी विश्वमै उदाहरणीय रहेको बताएका छन् ।

अमेरिकामा भएको संयुक्त राष्ट्रसंघीय शान्ति मिसन अन्तर्गत शान्ति सेनाको क्षमता, दक्षता र सुरक्षा सम्वन्धी मन्त्रिस्तरीय सम्मेलनमा भाग लिइ स्वदेश फर्किने क्रममा त्रिभुवन विमानस्थलमा मन्त्री ईश्वर पोखरेलले नेपाली सेना र प्रहरीको योगदान विश्व जगतमै उल्लेखनीय रहेको बताएका हुन् ।

मन्त्री पोखरेलले १५ चैतमा संयुक्त राष्ट्रसंघको मुख्यालय न्यूयोर्कमा भएको मन्त्रीस्तरिय बैठकलाई सम्वोधन गरेका थिए । संयुक्त राष्ट्रसंघको आह्वानमा शान्ति स्थापनाका लागि कार्यरत नेपाली सेना र प्रहरीले पुर्‍याइरहेको योगदानलाई अन्तर्राष्ट्रिय जगत समक्ष उजागर गर्न मद्धत पुगेको मन्त्री पोखरेलले जानकारी दिए ।

उपप्रधानमन्त्री पोखरेलले राष्ट्र संघको अनुरोधमा १० हजारसम्म शान्ति सेना परिचालन गर्न नेपाल तयार रहेको बताउँदै राष्ट्रसंघको अनुरोधमा नेपालले विभिन्न मिसनमा रहेर काम गरिरहेको जानकारी गराएको बताए ।

भ्रमणका क्रममा नेपाली सेनाको भूमिकाका बारेमा थप परिचित गर्न मद्धत पुगेको उनले बताए । त्यस्तै उनले शान्ति मिसनमा नेपाली सेनाको भूमिकाबारे प्रसंसा भएपनि नेपाली सेनालाई नेतृत्वदायी भूमिका नदिइएको बारेमा पनि छलफल गरिएको उनले बताए ।

अमेरिका बसाइका क्रममा संयुक्त राष्ट्रसंघका महासचिव एन्टोनियो गुटरेस लगाएतसंग भेटवार्ता भएको पोखरेलले बताए । मन्त्री पोखरेल मंगलबार अपरान्ह स्वदेश फर्किएका हुन् ।