काठमाडौं– हेलिकोप्टर दुर्घटनामा निधन भएकाको शव अन्तिम श्रद्धाञ्जलीका लागि सैनिक मञ्च टुँडिखेलमा पुर्‍याइएको छ । संस्कृति पर्यटन तथा नागरिक उड्डयनमन्त्री रवीन्द्र अधिकारीसहित ७ जनाको शव टुँडिखेलमा पुर्‍याइएको हो ।

हेलिकोप्टर दुर्घटनामा निधन भएकालाई अन्तिम श्रद्धाञ्जली दिन टुँडिखेलमा मञ्च बनाइएको छ ।

भावविह्वल आफन्त

हेलिकोप्टर दुर्घटनामा निधन भएकाको शव बिहीबार काठमाडौं ल्याइएको थियो । त्रिवि शिक्षण अस्पतालमा पोस्टमार्टमपछि शुक्रबार अन्तिम श्रद्धाञ्जलीका लागि टुँडिखेलमा राखिएको हो । शुक्रवार विहान ११ बजेसम्म शव टुँडिखेलमा राखिने जनाइएको छ ।

त्रिवि शिक्षण अस्पतालबाट शव पुग्दा टुँडिखेलमा मृतकका आफन्तको रुवाबासी चलेको छ । टुँडिखेलमा पुगेका धेरैजसो भावविह्वल मुद्रामा देखिन्छन् ।

मन्त्री अधिकारीलाई अन्तिम श्रद्धाञ्जली व्यक्त गर्न सत्तारुढ दल नेकपाका नेतादेखि कार्यकर्ता टुँडिखेलमा उपस्थित छन् । निधन भएका सातै जनालाई अन्तिम श्रद्धाञ्जली व्यक्त गर्न राष्ट्रपति, उपराष्ट्रपति, प्रधानमन्त्री लगायत विशिष्ट व्यक्ति सहभागी हुनेछन् ।