काठमाडौं – खगेन्द्र लामिछानेले निर्देशन गर्ने फिल्म ‘पानी फोटो’ को मुहुर्त गरिएको छ । राजधानीको बंगलामुखी मन्दिरमा फिल्मको मुहूर्त गरियो । युनिटले मन्दिरमा पूजा गर्दै छायांकनको शुभारम्भ ग–यो ।

खगेन्द्र लामिछानेको अभिनयमा डेब्यु रहने फिल्ममा अनुप बराल, सुनील पोखरेल, मेनुका प्रधान, प्रकाश घिमिरे, माओत्से गुरुङ, बुद्धि तामाङ्ग, कमलमणि नेपा , अशान्त शर्मा, मलिका महत, प्रकाश घिमिरे, श्यामकुमार खड्का लगायतका कलाकारको अभिनय रहने छ ।

नाटक ‘पानी फोटो’ मा आधारित यो फिल्ममा डेढ दशक अगाडि बेपत्ता भएको छोराको पर्खाइमा बसेका उसका बा–आमाको कथा देख्न सकिनेछ । यो नाटकले दर्शकबाट राम्रो साथ पाएको थियो भने पुस्तकका रुपमा पनि नाटक बजारमा उपलब्ध छ ।

चलचित्रको छायांकन स्याङ्जाका विभिन्न स्थानमा गरिनेछ । निर्देशन समेत रहेका खगेन्द्रले नाटक लेख्दा नै यो कथामा फिल्म बनाउन चाहेको बताए । फिल्मको एक दिनको छायांकन भने काठमाडौंमा हुनेछ ।

टुकी आर्टस् र मञ्जुश्री फिल्म प्रोडक्सनको ब्यानरमा निर्माण हुने ‘पानी फोटो’ लाई रोजिना सिटौला र रविन्द्र बज्राचार्यले संयुक्त रुपमा निर्माण गर्नेछन् ।

अर्को वर्ष रिलिज गर्ने तयारीमा रहेको यो फिल्ममा दीपक बज्राचार्यको छायांकन निमेष श्रेष्ठको सम्पादन तथा पुष्पा संगमले फिल्ममा पार्श्व संगीत रहनेछ । यो फिल्म खगेन्द्र ड्रिम प्रोजेक्ट पनि हो ।