काठमाडौं – यस वर्षको प्रतीक्षित चलचित्र ‘कबड्डी कबड्डी कबड्डी’ को ट्रेलर सार्वजनिक गरिएको छ । पहिले फिल्म रिलिज गरिने भनिएको मितिमा चलचित्रको ट्रेलर सार्वजनिक गरिएको हो ।

युट्युबमार्फत सार्वजनिक गरिएको ट्रेलरमा दयाहाङ राई र उपासनासिंह ठकुरीको प्रेम देख्न सकिन्छ । कुनै हिमाली गाउँको गुरुङ समुदायको कथा रहेको फिल्ममा कर्मा, बुद्धि तामाङ, विल्सनविक्रम राई, माओत्से गुरुङ, प्रकाश गुरुङ, रिश्मा गुरुङ, विज बराल, कविता आले, कमलमणि नेपाल लगायतका कलाकारको अभिनय रहेको छ ।

उपासना सिंह ठकुरी र दयाहाङ राईको वरिपरि घुमेको ट्रेलरमा उपासना र दयाहाङको एकअर्काप्रतिको आकर्षण देखाइएको छ भने यसअघिका सिरिजमा शीर्ष भूमिका रहेकी रिश्मा गुरुङलाई ट्रेलरमा छैनिन् ।

रामबाबु गुरुङले निर्देशन गरेको यो फिल्मको स्किृप्ट निर्देशक गुरुङ र उपेन्द्र सुब्बाले मिलेर लेखेका हुन् । असोज ३ गतेदेखि देशभरका हलमा रिलिज हुने यो फिल्मका अघिल्ला दुई सिरिज सुपरहिट भइसकेका छन् ।

चलचित्रलाई मणिराम पोखरेल, अर्जुन कार्की र ओम चन्द रौनियारले निर्माण गरेका हुन् । फिल्मको ट्रेलरले दर्शकबाट राम्रो प्रतिक्रिया पाइरहेको छ ।