कराकास– भेनेजुएलामा विपक्षी नेता हुआँ गुआइदोले निकोलस मादुरोको सत्ताविरुद्ध व्यापक जनप्रदर्शनको आह्वान गरेका छन् । मंगलबार गुआइदोको आह्वानपछि भएको सैनिक विद्रोहको निरन्तरताका लागि गुआइदोले मे दिवसका दिन बुधबार व्यापक जनप्रदर्शनको आह्वान गरेका हुन् ।

उनले सेनालाई मादुरोको साथ छाड्न र आफ्नो पक्षमा आउन आह्वान समेत गरेका छन् ।

राजधानी कराकासमा रहेको सैनिक अखडाबाट शुरु भएको सैनिक विद्रोह मुलुकका अन्य शहरमा पनि फैलिएको बताइएको छ । सैनिक विद्रोहका क्रममा १ सय जनाभन्दा धेरै घाइते भएका छन् ।

अर्कोतर्फ राष्ट्रपति निकोलस मादुरोले गुआइदोको आह्वानमा आफ्नो सत्ताविरुद्ध भएको सैनिक विद्रोहलाई ‘कु’ को संज्ञा दिँदै त्यो असफल भएको घोषणा गरेका छन् । राष्ट्रिय टेलिभिजनमार्फत् सम्बोधन गर्दै मादुरोले आफ्नोसत्ताविरुद्ध भएको सैन्य कु असफल भएको जनाएका हुन् ।